Netvafrinn og þróun hans hefur skipað stóran sess í tölvusögunni, en ævintýralegur uppgangur Netscape-fyrirtækisins er jafnan talinn upphafið að Dot-com bólunni. Netscape hannaði fyrsta vafrann sem náði almennri hylli og náði yfirburðastöðu á fyrstu árum Vefsins – þangað til Microsoft tók við sér og  setti Internet Explorer á markaðinn. Netscape réð ekki við risann í þeim slag og varð að játa sig sigrað. Um leið varð mörgum ljóst að Microsoft var orðið óþægilega einrátt á ýmsum sviðum.

 

Við tóku einokunartímar þar sem Microsoft var jafnan með vel yfir 90% hlutdeild á markaðnum og hagaði sér eftir því – þróun var afar hæg og lítið um nýjungar. Þetta tókst Mozilla að nýta sér því Firefox-vafrinn, sem kom fyrst út árið 2004, þótti standa Internet Explorer framar að flestu leyti. Hægt en bítandi hefur Firefox sótt í sig veðrið og var samkvæmt nýjustu tölum Net Applications kominn með nær 20% markaðshlutdeild á meðan IE var dottinn niður í rúm 72%. Þriðja hjólið hefur svo verið Safari-vafrinn frá Apple sem er með rúmlega 6% markaðshlutdeild. Aðrir mælast undir prósenti.

 

Með innkomu sinni á markaðinn varð Firefox þess valdandi að Microsoft þurfti að taka sér tak og gera eitthvað í sínum vaframálum. Frá 2004 hefur IE batnað, en jafnan verið nokkuð á eftir keppinautunum hvað nýjungar og þróun varðar. Microsoft hefur þó haldið sjó nokkuð vel hvað markaðshlutdeild varðar, sennilega sér í lagi í krafti þess að Internet Explorer fylgir öllum stýrikerfum á meðan notendur þurfa að hafa fyrir því að sækja aðra vafra, setja þá upp og stilla.

 

Og í síðustu viku skellti Google sér sem sagt í þennan slag nokkuð óvænt, því þótt einhver orðrómur hefði verið uppi um að vafri væri í þróun þar á bæ, datt engum í hug að hann kæmi svo óforvarandis á markað. Tilkynnt var um Google Chrome í teiknimyndasögu sem Google sendi á valda einstaklinga, og daginn eftir var opnað fyrir niðurhal á útgáfu sem Google segir þó að sé einungis Beta-útgáfa.

 

Þetta olli miklu fjaðrafoki og sennilegast hafa allir tölvu- og internetáhugamenn sem tölvumús gátu valdið sótt vafrann í síðustu viku og prófað. Svo eitthvað sé nefnt lofaði Google hraðari vinnslu, sér í lagi við flóknari verkefni á borð við keyrslu smáforrita í vafranum, auk þess sem ný hönnun sér til þess að þótt ein vefsíða frjósi, þá frýs ekki vafrinn í heild, heldur einungis sá flipi sem var með viðkomandi vefsíðu í vinnslu.

 

Viðtökur hafa almennt verið góðar, þótt ýmislegt hafi komið upp á – til að mynda þóttu notendaskilmálar vafrans huga of lítið að persónuvernd en Google lagaði það samdægurs. Svo hafa fundist öryggisholur í vafranum, en öryggismálin hafa löngum verið einn helsti höfuðverkur vafraframleiðenda.

 

Að sjálfsögðu er ég búinn að dútla með Google Chrome síðustu dagana og er bara nokkuð sáttur við þessi skref Google inn á vaframarkaðinn. Vafrinn er flottur og þægilegur í notkun – sérstaklega slóðarglugginn, sem er í anda Awesome bar í nýjasta Firefox. Þessi nýjung, að  sameina slóðargluggann, vafursögu og vefleit, er alger snilld. Jafnframt er upphafssíðan, sem sýnir myndir af mest heimsóttu vefjunum, flott nýjung auk þess sem niðurhalsstjórinn er góður.

 

Sumt hefur þó verið síðra, t.d. var letrið á ýmsum vefsíðum svolítið undarlegt, en það mátti þó laga með því að velja Clear Type í stýrikerfinu (Control Panel – Display – Appearance – Effects – og svo Clear type í stað Standard). Scroll-hnappurinn á músinni hjá mér virkar einungis niður en ekki upp í vafranum, sem er afar pirrandi og jafnframt var virknin í SharePoint á skrifstofunetinu ekki sérstaklega góð. Google er þó e.t.v. örlítil vorkunn með það, þar sem SharePoint er jú Microsoft-lausn. Þeir hjá Mashable hafa svo nefnt fleiri atriði sem fara í taugarnar á þeim.

 

Heilt yfir hef ég góða reynslu af notkun þeirrar þjónustu sem Google býður upp á og líst vel á vafrann eftir fyrstu dagana. Enn sem komið er hef ég þó ekki enn áttað mig á því hvort það sé nýjabrumið eða það að vafrinn sé einfaldlega betri en keppinautarnir sem gerir það að verkum að mér hefur fundist skemmtilegast að vafra í honum en hinum – en ég finn væntanlega fljótlega út úr því. Að minnsta kosti er ljóst að afar öflugur þátttakandi er mættur í vafrastríðið og við megum búast við hraðri þróun á þessum markaði á næstunni.